Sentâbr 24-te Kiyevde «Maqsat – Birlik» serlevalı bütün Ukraina vatanperver kvesti keçirilecek, merasimde Kiyev ve Qırım taqımları iştirak etecek. Bu aqta kvets teşkilâtçıları Facebook saifesinde bildire.
«Leyha maqsadı – bir şeerniñ bütün sakinlerini birleştirmek içün adiy soqaq oyunından küçlü içtimaiy leyha yapmaqtır. ATO-dan qaytqan askerlerge yardım etmek, olarğa tınç ayatqa alışmaq içün imkân bermek, bütün oyun iştirakçilerine çoqusı allarda ğalebe taqımnıñ birleşken işinen qazana bilecegini añlamağa imkân bermek müimdir», – dep aytıla beyanatta.
Haber etilgenine köre, merasim başlanacaq yer – Ekinci cian cenkinde Ukraina tarihı milliy müzeyi yanındaki aşağı parklama yeridir. Oyunda iştirak etmek içün kerekli şeyler: iştirakçiler taqımı, avtomobil, internet ve Kiyev haritasınen smartfon.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
