FSB «Noman Çelebicihan adına batalyondan» duşman tarafına keçken dep aytqan Rustem ve Akim Osmanovlar, kerçekten de, Qırım qamaçavı vatandaş aktsiyasınıñ iştirakçileri edi, amma iç bir vaqıt «Asker» ve «Noman Çelebicihan adına batalyonnıñ» azaları olmadı, dep bildirdi Qırım.Aqiqatqa Qırım qamaçavı aktsiyasınıñ lideri Lenur İslâmov.
Onıñ sözlerine binaen, bu adamlar «FSB tarafından yollanılğandır».
«Yazıq ki, bu, öz vaqtında FSB tarafından yollanılğan qırımtatarlardır... Büyügi apishanede oturğan edi. Böyle adamlarğa birden şübe ile davranamız, bunıñ içün olarnı iç bir yerge qayd etmedik. Kiçigi qamaçavda üç ya da eki kün oldı, büyügi ise, Rustem, «Çaplinka» nezaret noqtasında tahminen bir ay oldı. Bundan soñ o içti, ve onıñ komandanı Çingiz onı quvdı, soñra o vokzallarda yüre edi. Bundan soñ o yoq oldı, ve biz tek onıñ Qırımğa ketkenini bile edik», – dep ayttı İslâmov.
Onıñ sözlerine köre, Osmanovlar 2016 senesi qışta Qırım qamaçavı aktsiyasında iştirak etken edi. Aprel ayında qamaçav faalleri bildi ki, Osmanovlar yarımadağa qayttı.
«Olar bizge nege, ne içün kelgen edi? Şimdi olar özüne teslim etkenler dep aytsalar, aysa olar kim ola bile? Tek FSB-den yollanılğanlar. Çünki bizim halqımız hain degil, bu insanlar ise...», – dedi İslâmov.
Lenur İslâmov Akim Osmanovnıñ umumiy hocalıq vazifelerini yapqanı aqqında Qırım FSB-sı tarqatqan malümatnı tasdıqladı.
Sentâbr 23-te Rusiye Federal havfsızlıq hızmeti bildirdi ki, Qırımda «Noman Çelebicihan adına batalyonnıñ» eki azası – 37 yaşındaki Rustem Osmanov ve onıñ qardaşı, 20 yaşındaki Akim Osmanov – öz isteginen teslim etildi.
FSB-de qayd ettiler ki, Rusiye Cinaiy kodeksiniñ 208 maddesiniñ ilâvesine (qanunsız silâlı teşkilâtnı teşkil etüv ya da bunda iştirak etüv) binaen, Osmanovlar, «qanunsız silâlı teşkilâtta öz isteginen iştiragini toqtatqan» şahıslar olaraq, cinaiy mesüliyetten azat etildi.
Ukraina uquq qoruıcı organları terkibinde qırımtatar batalyonınıñ teşkil etilmesi aqqında muzakereler keçken seneden başlap devam ete. Qırımtatar Milliy Meclisinde bildirgen ediler ki, bu mesele boyunca bütün malümat Ukraina prezidenti Petro Poroşenko ve İçki işler nazirliginiñ yolbaşçısı Arsen Avakovğa teslim etildi.
Ukraina İçki işler nazirligi terkibine kirgen Ukraina Milliy gvardiyasında qayd eteler ki, olarnıñ terkibinde «qırımtatar batalyonınıñ» teşkil etilmesi aqqında beyanatlar şimdilik tek beyanat seviyesinde qalmaqta ve qanun boyunca qayd etilmedi.
Lenur İslâmov teşkil etilgen Noman Çelebicihan adına «qırımtatar batalyonına» arbiy bölük nomerı berilmesini talap ete.
