Link açıqlığı

Rusiye, Qara Deñiz üstünde uçaq seferleri içün telükeni peyda ete – Klimkin


Arhiv fotoresimi: Pavlo Klimkin

Rusiye Federatsiyası, Qara Deñiz üstünde uçaq seferleri içün ciddiy telükeni peyda ete. Bu aqta cumaaqşamı künü, Havfsızlıq Şurasında çıqışta bulunıp, Ukraina tışqı işler naziri Pavlo Klimkin ilân etti, dep bildire Ukrinform.

«Qanunsız Qırım işğalinen beraber 2014 senesi aprel ayından başlap, Rusiye Federatsiyası Ukraina tarafından baqılğan ava areketi hızmetiniñ halqara qazaiy alanına kirişip başladı. Böyle areketler açıq deñiz üstünde halqara ava boşluğında uçaq seferleri içün ciddiy telüke peyda ete ve Çikago konventsiyasına ve onıñ 15 ve 11-ci ilâvelerine, bunen beraber, bu meselenen bağlı ICAO-nıñ mütenasip qanunlarına zıt kele», – dep ilân etti Ukraina Tışqı işler nazirliginiñ yolbaşçısı.

Onıñ qayd etkenine köre, Rusiye bir taraf usulınen Aqmescit rayonı uçuş malümatında aeronavigatsion hızmetlerni özüne alğan soñ, o, bunen beraber, 2014 senesi mart ayında qabul etilgen Birleşken Milletler Teşkilâtı Baş Assambleyasınıñ Ukraina topraq bütünligi aqqında 262 sanlı rezolütsiyasını bozdı.

Bunen beraber, Klimkin Rusiyeniñ aeronavigatsion malümat derc etilüvine nisbeten areketlerini onıñ faaliyetini qanunlaştırmaq ıntıluv olanını ayttı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG