Link açıqlığı

Merkeziy saylav komissiyası Rusiye Devlet Dumasına saylavlarnıñ soñki neticelerini tasdıqladı


Rusiye Merkeziy saylav komissiyasınıñ reisi Ella Pamfilova

Sentâbr 23-ke keçer gecesi, cuma künü Merkeziy saylav komissiyası Rusiye Devlet Dumasına saylavlarnıñ soñki neticelerini tasdıqladı, rey berüv sentâbr 18-de keçirildi, dep haber ete Radio Svoboda.

«Yedinaya Rossiya» firqası, saylavlar neticelerine köre, anayasa çoqluğını ala – 343 mandat. KPRF firqası – 42 mandat, LDPR – 39 mandat, «Adaletli Rusiye» – 23 mandat aldı. «Rodina» («Vatan») ve «Grajdan platforması» firqalarınıñ temsilcileri, bunen beraber, özüni namzet etken birer mandat aldı. Saylavlarda vatandaşlarnıñ tahminen 48 fayızı iştirak etti.

Muhalifet, rey berüv devamında bozuluvlar sebebinden saylavlarnı qanunğa uyğan kibi tanımaqnı red etti, ve vatandaşlarnıñ iştirak etüv ve reyler esaplaması vaqtında bozuluvlar aqqında ilân etti. Ekspertler, farqlı bölüklerden açılğan malümatnı talil etip, bülletenler kütleviy şekilde atılğanını belgiledi.

Merkeziy saylav komissiyasınıñ reisi Ella Pamfilova bazı bozuluvlar yer alğanını ve müessisege tolu işanç teminlenmegenini tanıdı. Amma, onıñ sözlerine binaen, saylavlar qanun boyunca keçirildi.

Bunen beraber, Pamfilova qayd etti ki, ciddiy bozuvlar qayd etilecek yerlerde, neticeler belgilengen soñ da, saylavlar neticeleri lâğu etilecektir.

Bundan evel bu afta bozuv aqqında şikâyetler boyunca 32 cinaiy iş açıldı, doquz saylav bölüginde rey berüv neticeleri lâğu etildi.

XS
SM
MD
LG