Sentâbr 22-de qabul etilgen Qırımtatar Milliy Meclisiniñ qararınen, üç Meclis azasınıñ – Meclis reisiniñ muavini Ayder Acımambetov, Qırım müftisi Emirali Ablayev, Kremlge boysunğan Aqmescit rayonı memuriyeti yolbaşçısınıñ muavini Ruslan Yakubovnıñ azalığı toqtatıldı. Bu aqta QHA agentligi bildire.
QHA-nıñ bildirgenine köre, Meclis üç azasınıñ azalığı toqtatılmasınıñ sebebi – Qırımda işğalci ükümet tarafından teşkil etilgen siyasiy merasimlerde iştirak etüv, bunen beraber, kütleviy haber vastalarında Qırımtatar halqı Qurultayı delegatı statusına uymağan beyanatlar ve izaatlardır.
Bundan da ğayrı, Ayder Acımambetovnıñ Qırımtatar Milliy Meclisi reisiniñ muavini vazifesinden boşatılması aqqında qarar alındı.
«Acımambetov Meclis reisiniñ muavini vazifesini becermedi, bunen beraber, Qırımtatar halqı Qurultayı delegatı statusına uymağan beyanatlar ve izaatlarnıñ müellifi oldı», – dep aytıla beyanatta.
Bunen beraber, Qırım müftisi Emirali Ablayevniñ işğalci ükümet tarafından teşkil etilgen siyasiy merasimlerde iştirak etüv sebebinden Mecliste azalığı toqtatıldı.
«Yaqında özüni diniy lider olaraq ilân etken Qırım müftisi işğalci ükümet tarafından taqip etilgen musulmanlarnı qorçalama meselesinde iştirak etmedi, camilerde qanunsız tintüvler keçirilgeni, qırımtatarlarnıñ toplaşuvları ve mitingleri yasaq etilmesi aqqında indemedi. Bundan da ğayrı, Emirali Ablayev bir sıra kütleviy haber vastalarında Qırımtatar halqı Qurultayı delegatı statusına uymağan beyanatlar bildirdi», – böyle etip, Ablayev boyunca qarar añlatıla.
QHA bildire ki, Mecliste Ruslan Yakubovnıñ azalığı onıñ Rusiyege boysunğan Qırım icra organlarında işi ve işğalci ükümetniñ siyasiy merasimlerinde iştirak etüv, bunen beraber, Qırımtatar halqı Qurultayı delegatı statusına uymağan beyanatlar sebebinden toqtatıldı.
Qırımtatar halqı Qurultayınıñ nizamnamesine binaen, Meclis terkibinden çıqarılması aqqında qarar Qırımtatar halqı Qurultayınıñ nevbetteki sessiyasında qabul etile.
Qırımtatar Milliy Meclisi, Meclis reisinen beraber, 33 adamdan ibaret.
Qırım.Aqiqat yaqın vaqıtta Ayder Acımambetov, Emirali Ablayev ve Ruslan Yakubovnıñ Meclisnıñ bu qararına izaatlarını derc etecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
