Link açıqlığı

Keriçni suvnen teminlegen Novonikolayevskoye anbarınıñ suvu tahminen 20 künge yetecek. Bu aqta Rusiyege boysunğan mesken-kommunal hocalığı naziriniñ birinci muavini Ruslan Şarov ilân etti, dep bildire «AN Kerç» saytı.

«Eger suv anbarı 6 million kubometrden az tolu olsa, bu felâketli aqibetlerge ketirecek. Suv anbarında olacaq bulançıq şeerge ketecek. Bunıñ içün, suv anbarı toldurmasını tezleştirmege rica etemiz, çünki bu meselede problema bar», – dep ilân etti Kremlge boysunğan Keriç şeer memuriyetiniñ yolbaşçısı Mihail Sevastyanov.

«Qırım suvı» devlet işhanesi müdiri Anzor Borlakovnıñ sözlerine binaen, şimdiki vaqıtta suv anbarında 6,3 million kubometr suv qaldı.

«Şimdi şeer künde 43-45 biñ kubometr suv qullana, nevbetteki toldurma ne vaqıt olacağı bildirilmey», – dep qayd etti Borlakov.

«Argumenti Nedeli» YouTube kanalında video

Toplaşuv devamında belli oldı ki, Keriçte qızdırma ağları alâ daa suvnen toldurılmağan, bu ise qızdıruv mevsimine azırlıqnı telükeli ete. Bu aqta sentâbr 22-de kerch.com.ru saytı bildire.

Qırım Rusiye tarafından işğal etilgen soñ Ukraina yarımadağa Şimaliy-Qırım kanalında suv berilmesini toqtattı. Bu kanal vastasınen Ukraina Qırımnıñ suv ihtiyaclarınıñ 85 fayızını teminley edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG