Ağ, malümat tehnologiyaları ve kütleviy kommunikatsiya saasında nezaret boyunca Rusiye federal hızmeti, Radio Free Europe/Radio Liberty-den Qırım.Aqiqat saytınıñ blok etilmesi munasebetinen avgust başında yollanılğan mektüpke alâ daa cevap bermedi.
Sentâbr 22-de, cumaaqşamı künü Roskomnadzor matbuat kâtibi Qırım.Aqiqatqa bergen izaatında müessise ne içün eki ay devamında cevap bermegenini aytmadı.
Qırım.Aqiqat, Roskomnadzor matbuat hızmeti hadiminiñ muracaatınen, hızmetke añlatma almaq içün bir daa muracaat etti.
Avgust 1-de Radio Svobodanıñ leyhası olğan Qırım.Aqiqat saytı Rusiye tarafından işğal etilgen Qırımda qısmen blok etildi. Bir sıra provayderler saytqa kirişni blok etti.
Qırımnıñ rusiyeli malümat naziri Dmitriy Polonskiy Qırım.Aqiqatqa bildirdi ki, saytqa kiriş blok etilmesiniñ sebepleri aqqında onıñ haberi yoq.
OSCE-de, Qırım.Aqiqat saytınıñ blok etilmesi boyunca izaat berip, qullanıcılarnıñ İnternette malümat alma ve paylaşma aqqı haber saytlarına kirişni blok etüv vastasınen bozuluvından qasevet çekkenlerini bildirdiler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
