Sentâbr 21-de AQŞ Kongressiniñ Temsilciler palatası «Ukrainada istiqrar ve demokratiyağa destek aqqında» qanunnı qabul etti. Qanun, Amerika Qoşma Ştatlarına Qırım işğalini tanımağa yasaq ete ve Rusiyege qarşı sanktsiyalarnı ukrain yarımadanıñ azat etilecegine qadar devam ettire.
«Qanun, Amerika Qoşma Ştatlarına Rusiye Federatsiyası tarafından Qırım işğalini tanımağa yasaq ete. Belgilengenine köre, mütenasip sanktsiyalar, AQŞ Prezidenti yarımada Ukraina nezaretine qaytarılğanı aqqında Kongresske deliller ketirecegine qadar devam etecek», – dep bildire AQŞ-daki Ukraina elçiligi Facebook saifesinde.
Bunen beraber, vesiqa, Rusiye Federatsiyasına qarşı amerikalı sanktsiyalarnıñ Minsk añlaşmalarınıñ vaqtında, tolusınen ve isbatlanğan ömürge keçirüvine qadar saqlanacağını qayd ete.
Qanun belgilegen ve AQŞ ittifaqdaşları ve ortaqlarınen idare etilgen Ukrainağa destek malzemeleri cedveline mudafaa silâ sistemaları kire.
Ayrı maddeler, rusiyeli teşviqatqa qarşılıqnıñ qaviyleştirilmesi ve Ukraina iqtisadına ecnebiy yatırım celp etilmesini belgiley.
Demokratik ve Cumhuriyet firqalarından tahminen 40 kongressmen vesiqa müellifdeşi oldı. Endi Senat aynı mündericeli qanun leyhasına qol tutmalı, bundan soñ vesiqa AQŞ prezidentiniñ imzalanmasına teslim etilecek.
