Sentâbr 27-de Kiyevde Rusiye elçisi yanında faaller Qırımda rusiyeli işğal vaqtında ğayıp olğanlarğa destek köstermek içün kene de toplaşacaq. Bu aqta Facebook saifesinde aktsiya teşkilâtçıları olğan «KrımSOS» vatandaşlar teşebbüsi bildire.
«Qırım işğali devamında yarımadadan 15 kişi belgisiz ğayıp oldı, eñ azdan 8 adam öldürilgen tapıldı. Bütün bu vaqıt devamında ğayıp olğanlarnıñ soy-sopları qorqu ve belânen yaşay. Olarğa tek, Rusiye Federatsiyasına basım yapmaq içün ve yarımadada ğayıp olğan ukrainlerni evge qaytarmaq içün, ğayıplarnıñ kütleviy şekilde haber etilmesine ümüt beslemege qala», – dep qayd ete teşkilâtçılar.
Aktsiya er ay keçirile.
Rusiyege boysunğan Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
