Link açıqlığı

Magadan akimiyeti Çetteki Şimal bütün sakinleri içün işğal etilgen Qırımğa uçaq biletlerine imtiyaznı belgilegen ükümetniñ qanun leyhasına tüzetmeler azırladı. Bu aqta Krıminform, «İzvestiya» malümatına esaslanıp, bildire.

Neşirniñ malümatına binaen, şimdiki vaqıtta böyle imtiyazlar tek ayrı vatandaşlar kategoriyalarına berile, amma, tüzetmeler qabul etilse, şimal sakinleri içün işğal etilgen Qırım irişilir olur.

Magadan şeer dumasınıñ deputatı, Federatsiya Şurası yanındaki Yaş qanun çıqarıcıları palatası azası Anton Basanskiy «İzvestiya» agetligine bildirdi ki, leyha vilâyet ükümetine endi teslim etildi. Regional qanun çıqarma toplaşuvınıñ deputat komissiyası tarafından baqılğan soñ, vesiqa Naqliye nazirligine berilecek.

«Aqmescit şeerine ve arqa yol yönelişinde yolcular ava taşımasınıñ irişebilgenini teminlemek maqsadınen Federal bücetinden ava naqliyesi teşkilâtlarına subsidiyalarnıñ ayırılması qaideleri» 2016 senesi aprel 27-de qayd etilgen ükümetniñ 362 sanlı qararınen tasdıqlandı.

İmtiyazlı biletler kimge berilecegi aqqında bu vesiqanıñ ekinci maddesinde aytıla: 23 yaşına qadar bütün Rusiye vatandaşlarına, 55 yaştan büyük qadınlarğa, 60 yaştan büyük aqaylarğa ve bazı gruppalar saqatlarına.

Magadan qanun çıqarıcıları bu maddege böyle ibareni qoşmağa teklif ete: «bunen beraber, Çetteki Şimal sakinlerine, yaş sıñırlarına baqmadan».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG