İşğal etilgen Qırımda Metro ve Auchan avropalı supermarket ağları Avropa Birliginiñ sanktiyalarını qaçırıp çalışa, dep bildire Reuters.
Bu tükânlar ağlarında mahsulat yarımada territoriyasına Rusiyeden Keriç deñiz limanından ketirile, amma avropalı sanktsiyalar bunı yasaq ete, dep haber etti neşirniñ menbaları.
Avropalı sanktisyalarğa binaen, Avropa Birliginden şirketler Qırımda biznes alıp barıp olamay.
Reutersniñ bildirgenine köre, Metro ve Auchan temsilcileri ilân etti ki, olar sanktsiyalarnı bozmay, çünki tükânlar, Avropa Birliginiñ sıñırlama tedbirlerine kirmegen olarnıñ rusiyeli temsilcilerinden çalışa.
Uquqçılarnıñ qayd etkenlerine köre, Qırımğa mahsulatnıñ ketirilmesi sanktsiya rejiminıñ«boz zonasına» tüşe bile, çünki şirketler, olarnıñ regional temsilcileri ve temin eticiler arasındaki munasebetlerni belgilemege qolay degil.
Metro ve Auchan Reuters agentligine cevap berip, olarnıñ mahsulatı Qırımğa ketirilgeni aqqında malümatnı red etmedi.
Metro temsilcisi Reuters agentligine bildirdi ki, Metro tükânları Qırımda mustaqil rusiyeli şirket olaraq çalışa, bunıñ içün Avropa Birligi sanktsiyalarına tüşmey. Auchan temsilcisi ilân etti ki, olarnıñ şirketi qanun boyunca çalışa.
Avropa Birligi temsilcisi, anonim aqqınen, agentlikke bildirdi ki, Qırımda bu ağlarnıñ işi «sanktsiyalar ruhuna» qarşı kete.
«Amma ticariy embargo olmağanı içün er vaqıt nizam saqlaması ve saqlamaması arasında ince sıñır bar», – dep ayttı memur.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
