Link açıqlığı

Klintseviç: Erdoğannıñ Qırım boyunca beyanatı Rusiyenen munasebetlerni kerginleştire bile


Frants Klintseviç

Türkiye prezidenti Recep Tayyip Erdoğannıñ Ukrainağa Qırımnıñ mensüpligi meselesinde qol tutuv aqqında beyanatı protokol boyunca yapılğandır, amma Rusiyenen munasebetlerni kerginleştire bile. Bunı Rusiye Mudafaa ve havfsızlıq boyunca Federatsiya Şurası komiteti reisiniñ birinci muavini Frants Klintseviç ilân etti. Bu aqta RİA Krım agentligi bildire.

«Daa bir tasdıqlama aldıq: Türkiyenen «dostluğımıznıñ» belli bir sıñırı ve şartları bar. Elbet, Ukrainağa qol tutuv aqqında protokol sözlerinden Recep Erdoğan uzaq barmazdır», – dep qayd etti Klintseviç.

Onıñ fikrince, Erdoğan bu vaziyette neni telükege qoyğanını yahşı añlay – Rusiye ve Türkiye arasındaki munasebetler endi eyileşip başlaydı.

«Amma sözler – bu boş ses degildir. Türkiye prezidenti bir royalde birden bir qaç nağme çalmağa istegen kibi kele. Rusiyeli tışqı siyaset müessisesinde buña diqqat etkenlerinden, ve bundan mütenasip netice çıqarğanlarından şübem yoq», – dep ayttı siyasetçi.

Türkiye Ukrainağa mustaqillik ve topraq bütünligi yañıdan tiklenilmesi meselesinde qol tutmağa devam etecek. Bu aqta Türkiye prezidenti Recep Tayyip Erdoğan sentâbr 20-de New-Yorkta keçirilgen ukrain prezidenti Petro Poroşenkonen körüşüvde ilân etti.

Erdoğannıñ sözlerine binaen, Ankara ve Kreml arasındaki munasebetler eyileşkenine baqmadan, Türkiye Qırımnıñ Rusiye tarafından işğalini tanımamağa, bundan da ğayrı, qırımtatarlarnıñ aqları bozulmasını takbih etmege devam etecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG