Endi bir yıl devamında Birinci milliy Radio yayınında çıqqan Radio Svobodanıñ leyhası olğan Qırım.Aqiqat Radiosı sayesinde Qırım sakinleri Qırımda neler olğanı aqqında kerçek malümat ala bile. Böyle fikirni Qırım.Aqiqat Radiosınıñ saba yayınında Aqyardan daimiy diñleyici Viktoriya bildirdi.
«Yubileynen hayırlamağa, eñ yahşısını tilemege isteyim, siz – Qırımnıñ eñ vatanperver radiosı, bizim yarıq nurumız olasıñız, er şey içün, malümat içün sağ oluñız», – dedi Viktoriya.
Öz adını aytmağan Qırımdan diger daimiy diñleyici ayttı ki, yerli kütleviy haber vastalarından kerçek malümatnı, meselâ, işağl etilgen Qırımda Moskva tarafından keçirilgen Rusiye Federatsiyası Devlet Dumasına saylavlarğa az adam kelgeni ve saylayıcılarnı satıp aluv aqqında malümatnı almağa imkân yoq.
İşğal etilgen yarımadadan yayınğa telefon etken daa bir daimiy diñleyici Aleksey ayta ki, studiyağa davet etilgen ekspertlerniñ noqta-i nazarları onıñ noqta-i nazarına bir kelmese bile, Qırım.Aqiqat Radiosını diñlemek meraqlıdır.
«Bir yıl devamında yalan aytqanıñız ve amerikalı şablonlar boyunca adiy ucuz teşviqat yapqanıñız ile hayırlamağa isteyim... Siziñ bir biriñizni Qırımda er şey yaramay olğanı aqqında inandırmağa tırışqanıñıznı diñlemek menim içün daima meraqlı ola, siziñ ukrain ekspertleriñiz», – dedi Aleksey.
Qırım.Aqiqat Radiosı Radio Svoboda tarafından, Qırım.Aqiqat leyhasınen beraberlikte yarımadada radio yayınınıñ ğayrıdan tiklenilmesiniñ ekinci basamağı çerçivesinde, Ukraina haber siyaseti nazirliginiñ destegi ile teşkil etildi.
Qırım.Aqiqat Radiosını iş künleri saat 8:35-te ve 18:30-da Qırım.Aqiqat saytında ve orta dalğalarda 549 kilogerts sıqlığında diñlemek mümkün. Qırım sakinleri yayınğa 8 800 100 69 26 nomeri vastasınen telefon ete bile ya da nevbetteki elektron adreske yaza bile: crimea.reality@gmail.com.
