Link açıqlığı

Türkiye Ukrainağa topraq bütünligi yañıdan tiklenilmesi meselesinde qol tutmağa devam etecek


Arhiv fotoresimi: Türkiye prezidenti Erdoğan ve qırımtatar liderleri Mustafa Cemilev, Refat Çubarov

Türkiye Ukrainağa mustaqillik ve topraq bütünligi yañıdan tiklenilmesi meselesinde qol tutmağa devam etecek. Bu aqta Türkiye prezidenti Recep Tayyip Erdoğan New-Yorkta ukrain prezidenti Petro Poroşenkonen keçirilgen körüşüvde ilân etti, dep bildire Ukraina yolbaşçısınıñ matbuat hızmeti.

Erdoğannıñ sözlerine binaen, Ankara ve Kreml arasındaki munasebetler eyileşkenine baqmadan, Türkiye Qırımnıñ Rusiye tarafından işğalini tanımamağa, bundan da ğayrı, qırımtatarlarnıñ aqları bozulmasını takbih etmege devam etecek.

Avgust 20-de Ukraina prezidenti Petro Poroşenkonen telefon lafında Türkiye Cumhuriyeti prezidenti Recep Tayyip Erdoğan Ukraina topraq bütünligi meselesi boyunca noqta-i nazar deñişmeyip qalğanını bildirdi. Bunen beraber, Türkiye prezidenti ilân etti ki, Türkiye Cumhuriyeti Qırım işğalini tanımay ve qırımtatarlarğa qol tutmağa devam etecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG