Link açıqlığı

Saatnıñ esas haberi

Adliyeci: «Çiygoznıñ işi» boyunca mahkemede zararlanğanlar qırımtatarlarnıñ tarafından tecavuz olmağanı aqqında ayta


Sentâbr 20-de «Çiygoznıñ işi» boyunca mahkeme toplaşuvında üç zararlanğan kişi sorğuğa çekildi. Olar qabaatlınıñ konkret areketlerini aytıp olamadı, amma 2014 senesi fevral 26-da Qırım Yuqarı Radasınıñ binası ögünde miting keçirilgen künü qırımtatarlarnıñ tarafından tecavuz olmağanını qayd etti. Bu aqta Qırım.Aqiqatqa Çiygoznıñ adliyecisi Nikolay Polozov bildirdi.

«Şimdilik 84 zararlanğandan 35 kişi sorğuğa çekildi – yarımdan az. Mahkeme prokurorğa onıñ zararlanğanlarnı vaqtında ketirilmesini temin etmegeni, böyle etip dava uzanğanına, mahkeme süyreklenüvine yol bergeni içün bir qaç sefer tenbiley edi», – dep qoştı Polozov.

Bunen beraber, sentâbr 20-de toplaşuvda Çiygoznıñ imayesi onıñ mahkeme zalına ketirilmesi aqqında şefaat arizasını berdi, amma o red etildi.

Kremlge boysunğan Qırım Yuqarı mahkemesinde «Çiygoznıñ işi» boyunca nevbetteki mahkeme künü sentâbr 21-de, saat 11:00-de başlanacaq.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Ahtem Çiygoz mahkemede özüni qabaatlı tanımadı.

XS
SM
MD
LG