Ukraina tışqı işler naziri Pavlo Klimkin Amerika Qoşma Ştatlarına ziyaret vaqtında türkiyeli zenaatdaşı Mevlüt Çavuşoğlu ile körüşüv keçirdi, bunıñ çerçivesinde, hususan, qırımtatarlarnıñ vaziyeti muzakere etildi. Bu aqta Birleşken Milletler Teşkilâtı yanındaki daimiy Ukraina temsilciliginiñ beyanatında aytıla.
«Pavlo Klimkin ve Türkiye TİN Mevlüt Çavuşoğlu eki taraf işbirligi, Yaqın Şarqtaki vaziyetni ve qırımtatarlarnıñ alını muzakere ettiler», – dep aytıla beyanatta.
Pavlo Klimkin Amerika Qoşma Ştatlarına Birleşken Milletler Teşkilâtı (BMT) Baş assambleyasınıñ 71-ci sessiyasınıñ yüksek seviye bölüginde iştirak etmek içün ketti.
AQŞ-da nazir, hususan, ava havfsızlığı boyunca BMT Havfsızlıq şurasınıñ ve MN17 ava felâketi taqiqatı boyunca beraberlikte yapılğan taqiqat taqımınıñ yüksek seviye toplaşuvlarında, GUAM ve GUAM+ toplaşuvlarında Ukrainanı resmiy temsil etecek, bundan da ğayrı, Rusiye tarafından zorbalıq devam etecek alda Ukrainanen halqara birdemlikniñ nevbetteki birleşmesi maqsadınen bir sıra eki taraf körüşüvlerini keçirecek.
Klimkinniñ programması çerçivesinde Sent-Kits ve Nevis boyunca eki taraf viza talaplarınıñ lâğu etilmesi aqqında añlaşmanıñ imzalanması planlaştırıla.
