UNESCO kâtibiyeti UNESCO İcra şurasınıñ qararları ömürge keçirilmesi aqqında «Qırım Muhtar Cumhuriyetindeki vaziyetniñ nezaret etilmesi» maruzasını derc etti. Bu aqta Ukraina prezidentiniñ qırımtatar halqı meseleleri boyunca vekâletlisiniñ Facebook saifesinde bildirile.
Maruzada aytıla ki, yarımada Rusiye tarafından işğal etilgen soñ, UNESCO-nıñ elinde olğan malümat boyunca, vaziyet kerginleşmege devam ete. Ukrain tarafı ve UNESCO ortaqlarınıñ malümatı yarımadada insan aqları kütleviy ve daimiy şekilde bozulğanını köstere.
«Böyle vaziyetniñ esas sebeplerinden biri, Qırımdaki vaziyet boyunca halqara nezaret olmağanı, vaqtınca işğal etilgen topraqlarda Rusiye Federatsiyası qanunları talaplarınıñ ve işğalci ükümet tarafından millet ve din mensüpligine köre yapılğan ayırım siyasetiniñ mecburiy qullanılması ola», – dep aytıla maruzada.
Maruzada UNESCO yanındaki Daimiy Ukraina temsilcisiniñ Teşkilâtnıñ Baş müdiri adına mektübiniñ metini, bunen beraber, Ukraina Medeniyet nazirliginiñ İ.K. Ayvazovskiy adına Milliy resim galereyasından, bu degerlerniñ yekâne saibi olğan Ukrainanıñ razılığı olmağan vaziyette, Rusiyege resimlerniñ qanunsız çıqarılması munasebetinen yazılğan arizası metini taqdim etile.
Bundan da ğayrı, UNESCO, «Tavriya Hersonesi qadimiy şeer» UNESCO dünya asabalığı ukrain obyekti ve diger medeniyet obyektlerinde Ukraina tarafından nezaret etüv imkânı olmağanı aqqında bildire.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
