Link açıqlığı

Saatnıñ esas haberi

Qırımda 1,7 tonna ukrain ve poloniyalı sucuq ve qaşqaval furunda yaqıldı


İllüstratsiya fotoresimi
İllüstratsiya fotoresimi

Aqmescitteki anbarda 1,7 tonna yaramay ukrain, poloniyalı sucuq ve qaşqaval tapıldı, dep bildire Kremlge boysunğan Qırım Rosselhoznadzornıñ matbuat hızmeti.

Müessiseniñ bildirgenine köre, ketirilmesi yasaq olunğan mahsulat Aqmescitteki «Ticariy Alyans» («Torgovıy Alyans») buzlatma kamerasında tapıldı. İşhanede, veterinar vesiqaları olmağan, Poloniya ve Ukrainada yapılğan 1695 kilogramm sucuq mahsulatı saqlana edi.

«Ukrain «Alan» işhanesinde yapılğan satlıq mallarnıñ çoqusı (1614,5 kg) yaramay keyfiyetli edi: qılıf altında küf, şingenlik, ava bulunması, çürügen qoqusı ve ilâhre. Bunen beraber, buzlatma kamerasında veterinar vesiqaları olmağan, Ukrainada yapılğan 25,8 kg qaşqaval tapıldı. İstimalcılarnıñ ayatı ve sağlığı içün havflı mahsulat satılıştan çıqarıldı ve furun-insineratorda yaqıldı», – dep qayd ete matbuat hızmeti.

Rusiyede ve Qırımda, evel Moskvağa qarşı, onıñ Qırımnı işğal etkeni ve Ukraina şarqında basqıncılığı sebebinden, sanktsiyalar kirsetken devletlerden aşayt mahsulatı ve köy hocalığı mahsulatınıñ italine sıñırlanma kirsetildi.

2015 senesi avgust 6-dan başlap, Rusiye prezidenti Vladimir Putinniñ emrine esaslanıp, qanunsız mahsulatnı, evel yapılğanı kibi teslim eticige qaytarmağa degil de, yoq etmege başladılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG