İşğal etilgen Qırımda Rusiye Devlet Dumasına saylavlar vaqialarsız keçti. Bu aqta Rusiye Fevqulade vaziyetler nazirligi Qırım idaresiniñ matbuat hızmeti bildire.
Qayd etilgenine köre, «Qırım Cumhuriyeti yanğın qoruvı» müessisesiniñ hadimleri 94 saylav bölügini nezaret etti, hadimler tahminen 300 talimat keçirdi.
Bundan da ğayrı, «KRIM-SPAS» qaza-qurtarıcı taqımlarınıñ 36 hadimi saylav bölüklerinde havfsızlıqnı teminley edi.
«Umumen olaraq, rey berüv künü havfsızlıq teminlemesi boyunca profilaktika tedbirleri çerçivesinde 1198 saylav bölügi baqıldı, tahminen 200 yanğın ve qaza-qurtarıcı tehnika celp etildi», – dep aytıla beyanatta.
Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Çarp devletleti qattı tenqit etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
