Link açıqlığı

Poroşenko Qırım ve Donbassta insan aqları bozuluvı sebebinden Rusiyege qarşı sanktsiyalarnı daa qattı yapmağa çağırdı


Ukraina prezidenti Petro Poroşenko AQŞ ukrain cemiyeti temsilcilerinen körüşüvde Rusiyege qarşı sanktiyalarnıñ devam ettirilmesi ve daa qattı yapılması müim olğanını qayd etti, dep bildire prezidentniñ matbuat hızmeti.

«İşğal etilgen topraqlarda insan aqları, bu cümleden qırımtatarlarnıñ aqlarınıñ bozulması qoşma sanktsiyalarnıñ kirsetilmesini talap ete. Dünya buña mıtlaqa cevap bermeli. Meselâ, Jekson-Venik tüzetmesiniñ zemaneviy timsali bizim içün yahşı netice ketire bile», – dep ilân etti prezident, ve bu yönelişte faaliyet planını tizmege çağırdı.

Petro Poroşenko Amerika Qoşma Ştatlarına Birleşken Milletler Teşkilâtı Baş assambleyasınıñ sessiyası işinde iştirak etmek içün keldi. Sentâbr 18-de, aqşam Ukrain devletiniñ yolbaşçısı New-Yorkta öz ziyaretini AQŞ ukrain cemiyeti temsilcilerinen körüşüvden başladı.

Ukrain prezidenti büyük devletler liderleri ile, bunen beraber, AQŞ prezidenti vazifesine Demokratik firqasından namzet Hillari Klinton ile körüşecektir. Ukraina prezidentiniñ matbuat kâtibi Svâtoslav Tsegolko, Klinton ile planlaştırılğan körüşüv aqqında bildirdip, Poroşenkonıñ cumhuriyetçi-namzet Donald Tramp ile körüşüvni beklegenini qayd etti.

XS
SM
MD
LG