Ukraina, Rusiye Federatsiyası tarafından Devlet Dumasına saylavlarnıñ işğal etilgen Qırımda ve Aqyarda keçirilmesini qattı takbih ete. Rey berüv neticeleri qanunsızdır ve bütün Rusiye Devlet Dumasınıñ qanuniy olğanını şübeli ete. Bu aqta sentâbr 19-da derc etilgen ukrain Tışqı işler nazirliginiñ beyanatında aytıla.
«Rusiye tarafından Ukraina mustaqil toprağınıñ ayırılmaz qısmınıñ yekâne federal saylav okrugına kirsetilmesi, em de Qırım yarımadasında dört majoritar bir mandatlı saylav okrugınıñ teşkil etilmesi, halqara uquq esas qaideleri ve printsipleriniñ bozulması ola. Bundan sebep, rey berüv neticeleri ve Devlet Dumasınıñ işğal etilgen Qırımda majoritar sisteması boyunca saylanılağn 4 deputatınıñ vekâleti , ve mütenasip sistema boyunca saylanılğan 225 parlamentariy qanunsız ola, bu ise bütün Devlet Dumasınıñ qanuniy olğanını şübeli ete», – dep aytıla müessiseniñ beyanatında.
Sentâbr 19-da, bazarertesi künü «Narodnıy front» («Halq cebesi») fraktsiyası, Rusiye Federatsiyası yañı saylanılğan Devlet Dumasınıñ qanuniy olğanını tanımama aqqında qanun leyhasını qayd etti.
Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Çarp devletleti qattı tenqit etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
