Qırımtatar halqınıñ lideri Mustafa Cemilev Amerika Qoşma Ştatlarında Ukraina mustaqilliginiñ 25 yıllığına bağışlanğan konferentsiyada bulunıp, işğal etilgen Qırımda aq-uquq ve serbestlik vaziyeti aqqında añlattı. Bu aqta malümat Ukraina prezidentiniñ qırımtatar halqınıñ meseleleri boyunca vekâletlisiniñ Facebook saifesinde bildirdile.
«Soñki merasim – «Zemaneviy Ukrain devleti 25 yıllığınıñ qayd etilmesi» konferentsiyası devamında amerikalı isteblişmentke işğal etilgen Qırımda aq-uquq ve serbestlik vaziyeti aqqında añlatmaq imkânım oldı. Yaqında «abadan olğan» turistik Qırım tecavuzcı tarafından arbiy bazağa, «qorqu ve yalan zonasına» çevirile, bu ise, bütün dünya içün telükelidir», – dep qayd etti Cemilev.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
