Amerikalı taqiqatçılar New-Yorkta yüz bergen patlavnıñ şaraitini ögrenmege devam ete, sentâbr 17-de bu vaqia neticesinde 29 kişi yaralandı.
Halqara haber agentlikler ve ABC-News telekanalınıñ malümatına binaen, sentâbr 18-de aqşam taqiqat çerçivesinde beş adam yaqalandı. Olar avtomobilde kete edi ve New-Yorktaki Bruklin rayonında yolda toqtatıldı, bundan soñ sorğuğa çekilmek içün Manhettende yerleşken Federal taqiqat bürosına ketirildi.
Sentâbr 19-da FBR ilân etti ki, bu beş adamdan iç birine New-Yorkta Çelsi rayonındaki soqaqta yüz bergen patlav boyunca qabaatlav taqdim etilmedi.
Bundan da ğayrı, ükümet patlavnıñ bu kün bundan evel New-Yorkta yüz bergen diger vaqianen ve New-Jerside patlavnen bağlı olğanını ögrene.
Resmiy şahıslar bildirdi ki, er angi halqara terroristik taqımnıñ bu vaqianen bağlı olğanınıñ delilleri şimdilik yoq.
