Link açıqlığı

Sentâbr 17-de Rusiyege boysunğan Bağçasaray şeer şurası şeer memuriyeti yolbaşçısı vazifesine Aleksandr Trânovnı belgiledi. Bu aqta Kriminform bildire.

Şeer şurası sessiyasınıñ toplaşuvında Trânovnıñ tayinlenmesi içün 14 deputat rey berdi, üç deputat – rey bermedi ve ekisi – bitaraf oldı.

Bundan evel konkurs komissiyası Bağçasaray şeer memuriyeti yolbaşçısı vazifesine namzet olaraq Elza Makarovanı ve Aleksandr Trânovnı belgiledi. RİA Novosti agentliginiñ bildirgenine köre, sessiyada Makarova özüni namzetlikten çıqardı ve deputatlarnı Trânovğa qol tutmağa rica etti.

Bu sene mayıs 25-te Bağçasaray memuriyetiniñ sabıq yolbaşçısı vazifesine tayinlengen İgor Beletskiy, Qırımnıñ rusiyeli yolbaşçısı Sergey Aksönov ile muzakerelerden soñ, istifağa çıqmaq içün ariza yazdı.

RİA Novosti agentliginiñ bildirgenine köre, Bağçasaraynıñ yañı şeer yolbaşçısı Aleksandr Trânov Özbekistandaki Termez şeerinde doğdı. O, 2007 senesi Rusiye Federatsiyası Ükümeti yanındaki Maliye Akademiyasını bitirdi. Aleksandr Trânov 2016 senesi iyün 24-ten Bağçasaray rayon memuriyeti yolbaşçısınıñ muavini vazifesini eda etken edi.

XS
SM
MD
LG