Sentâbr 17-de «Bizim balalar» leyhasınıñ faalleri Qırım siyasiy mabusları ve ğayıp olğan ya da qaçırılğan qırımtatarlarnıñ qorantaları içün bayram keçirecek.
«Bu qorantalar içün Qurban bayramını teşkil etmege planlaştıramız. Sıcaq müitte bulunmağa isteymiz. Bu balalar maneviy taraftan kergin vaziyette buluna. Olarnen neler olğanını pek yahşı añlaylar. Bunıñ içün Bağçasarayda böyle bayram teşkil etmege isteymiz. Balalar içün eglence programmasını yapmaq», – dep bildirdi Qırım.Aqiqatqa «Bizim balalar» birleşmesi Şurasınıñ azası Elzara İslâmova.
«Bizim balalar» leyhası bu sene musulmanlar içün muqaddes Ramazan ayında başlatıldı. Leyha teşebbüsçisi belli Qırım mühbiri Lilâ Bucurova oldı. Bunıñ esas maqsadı – Qırım siyasiy mabusları ve ğayıp olğan ya da qaçırılğan qırımtatarlarnıñ qorantaları balalarına yardım etmektir. «Bizim balalar» birleşmesiniñ Şurası teşkil etildi, onıñ içine lâqayt olmağan ve itibarlı adamlar kirdi, konkret icracılar belgilendi, olar malümatnı toplay ve tertipke ketire, paranı toplay ve muhtaclarğa teslim ete. Leyha tek para yardımını degil de, çeşit yardım şeklini qabul ete: para, urba ve oyuncaqlar, balalar içün raatlıq ve tedaviylenüvniñ teşkil etilmesi, ruhiy reabilitatsiya, mabuslarnıñ qorantalarına hocalıq boyunca yardım.
