Sentâbr 16-da, cuma künü Aqmescitte cep telefonındaki internet bağı çalışmay, dep bildire rusiyeli adliyeci Nikolay Polozov Twitterde, o «Çiygoznıñ işi» boyunca mahkeme toplaşuvında iştirak etmek içün keldi.
Polozovnıñ tahmin etkenine köre, internet bağınıñ blok etilmesi, şeerge Rusiye prezidenti Vladimir Putinniñ kelmesinen bağlı ola bile.
«Putinniñ Aqmescitke (ola bilecek) kelmesi içün mob. interneti söndürildi. Ahtem Çiygoznıñ işi boyunca mahkeme saat 14:00-te başlanacaq – zararlanğan kişi kelmedi», – dep yazdı Polozov Twitterde.
Vladimir Putin ve Dmitriy Medvedev sentâbr 15-te, cumaaqşamı künü Keriçni ziyaret etti, bu yerde Rusiye Devlet şurası prezidiumınıñ «devletniñ cenübinde naqliye sistemasınıñ inkişafı meseleleri boyunca» toplaşuvı keçirildi. Bunen beraber, rusiyeli yolbaşçılar Keriç köprü qurulması ketişatınen tanış oldı.
Ukraina Tışqı işler nazirligi ilân etti ki, Vladimir Putin ve Dmitriy Medvedevniñ Qırımğa ziyareti munasebetinen Rusiye adına narazılıq mektübini azırlay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
