Sentâbr 18-de, Rusiye Devlet Dumasına saylavlar keçirilecek kün işğal etilgen Qırımda 1,5 biñ yanğıncı ve qurtarıcı nevbette turacaq. Olar saylav bölüklerinde havfsızlıqnı nezaret etecek. Bu aqta Rusiye Fevqulade vaziyetler nazirliginiñ Qırım idaresi matbuat hızmeti bildire.
Bildirilgen malümatqa köre, işğal etilgen yarımadada endi bütün 1198 saylav bölügi baqıldı. O yerde qoruyıcılar yanğın söndürici aletlerini, tışqı suv menbalarınıñ bulunmasını, tahliye yollarını ögrendi.
«Yanğın söndürilmesi içün mesüliyetli şahıslarğa fevqulade vaziyette etilecek areketler añlatıldı. Umumen olaraq, yanğın vaziyet peyda olacaq alda adamlarnıñ tahliye etilmesi boyunca 954 talimat, 643 mesleat ve 252 ameliy idman keçirildi», – dep bildire müessiseniñ matbuat hızmeti Rusiyege boysunğan işğal etilgen Qırımnıñ fevqulade vaziyetler naziri Sergey Şahovnıñ sözlerini.
Sentâbr 18-de Rusiye Devlet Dumasına saylavlar keçirilecek, rusiyeli ükümet bunı işğal etilgen Qırım territoriyasında da keçirmege niyetlene.
Sentâbr 8-de Ukraina Yuqarı Radası fermannı qabul etip, ecnebiy devletler parlamentlerini, parlament assambleyalarını ve halqara teşkilâtlarnı Rusiye tarafından işğal etilgen Qırımda keçirilecek qanunsız parlament saylavlarını nezaret etüvde iştirak etmekten vazgeçmege ve bunıñ neticelerini tanımamağa çağırdı.
