Qırım ile memuriy sıñırda rusiyeli sıñırcılar işğal etilgen yarımada territoriyasına kirmege tırışqan Ukraina vatandaşını tuttı.
TASS agentliginiñ bildirgenine köre, Qırım boyunca FSB sıñır idaresinde qayd eteler ki, 28 yaşındaki ukrain sanki halqara qıdıruvda buluna.
«Malümat baqılması vaqtında «Ermeni Bazar» (Armânsk) keçirüv noqtasında nezaretçi, Ukraina Devlet sıñır hızmeti hadimleri tarafından maniasız yiberilgen yaş adam bu sene iyün ayından halqara qıdıruvda bulunğanını belgiledi», – dep aytıla beyanatta.
Bunen beraber, müessisede yaqalanğan kişiniñ ne adını, ne de yaqalanğan tarihını bildirmeyler.
Müessiseniñ malümatına binaen, yaqalanğan ukrain «Özbekistanda mıtlaqa qanunlaştırılacaq faaliyetnen (internet-serverniñ teşkil etilmesi ve çalışması) oğraşa edi. Bunen beraber, onıñ elinde mahsus razılıq yoq edi, bunıñ içün yerli uquq qoruyıcı organlar onı başta yerli qıdıruv, bundan soñ ise, halqara qıdıruvğa ilân etti».
«Ukrain kişi, evelden şahıslar taqımı ile añlaşma yapıp, onıñ terkibinde cinayet yapqanını köz ögüne alıp, teşebbüs.i devletniñ qanunlarına binaen, o, büyük para cezsınen cezalana ya da altı ayğa apiske qapatıla bile», – dep qayd etile beyanatta.
Qırımda ve Rusiyede çeşit cinayetlernen qabaatlanğan Ukraina vatandaşlarınıñ yaqalanmaları sıq oldı.
Avgust 10-da Rusiye Federal havfsızlıq hızmeti bildirdi ki, işğal etilgen yarımadada kerçekleştirilecek teraktlarnıñ ögü alındı. Moskva Ukrainanı qabaatlay. Rusiye prezidenti Vladimir Putin FSB beyanatını izaatlap, Kiyev muzakereler yolunı degil, terrorğa keçe, dep ayttı. O, «norman formatında» sammitni keçirmek «fayda yoq», dep qayd etti.
Ukraina prezidenti Petro Poroşenko Kremlniñ Qırım qabaatları «sebepsiz ve tsinik» olğanını ayttı.
Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etildi.
Ukraina prezidenti Rusiye tarafından işğal etilgen Qırım ile memuriy sıñırda ve Donbassta bütün sıñır boyunca arbiy azırlıqnı qaviyleştirmege emir etti.
Qırım 2014 senesi Rusiye tarafından işğal etilgen soñ qıtaiy Ukraina ve yarımada arasında resmiy olaraq memuriy, aqiqaten ise, kerçek «sıñır» yerleşti. Memuriy sıñırda üç kiriş/çıqış nezaret noqtası çalışa: «Kalançak», «Çonğar» ve «Çaplinka».
