Link açıqlığı

Saatnıñ esas haberi

Rusiye Aqyar yanında özek anbarında 6 özek başlığını qoydı – Cemilev


Mustafa Cemilev
Mustafa Cemilev

Rusiye ükümeti Qırımda özek quvetlerini qaviyleştire. Bu aqta Amerika Qoşma Ştatlarında qırımtatar halqınıñ lideri Mustafa Cemilev AQŞ ve Ukraina umumiy fondu tarafından teşkil etilgen «Ukraina Vaşingtonda» forumında ilân etti, dep bildire «Amerika sesi».

«Bir vaqıt taşlanılğan Qızıltaş adlı Aqyar civarındaki özek anbarı Qırım işğal etilgen soñ tamir etildi. Elimizde olğan malümatqa köre, o yerde endi 6 özek başlığı bar», – dedi Cemilev.

Onıñ qayd etkenine köre, Rusiye yarımadanı arbiy bazağa çevirdi, bunıñ içün Qırımnıñ küçnen qaytarılması – yaramay bir fikir, çünki «yarımadadan bir şey qalmaz».

bildirilgen malümatqa binaen, rusiyeli basqıncılıq, sanktsiyalar ve Ukraina iqtisadı aqqında laf etmek içün kelgenlerniñ çoqusı – amerikalılardır: Kongress azaları, halqara siyaset boyunca ekspertler, ukrain diasporasınıñ temsilcileri.

«Bugün, iç olmağanı kibi, biz birliktemiz. Devletimde olğan qıyınlıqlar ve telükeler – bütün dünya ve AQŞ içün de çağıruv ve telükedir», – dep toplaşqanlarğa muracaat etti AQŞ-daki Ukraina elçisi Valeriy Çalıy.

Bundan evel Ukraina Mudafaa nazirliginiñ Baş istihbarat idaresi bildirdi ki, «Qavqaz-2016» arbiy ögrenüvlerniñ yekünleyici faal qısmı çerçivesinde rusiyeli ava quvetleri askerleri ücüm ameliyatı areketlerini işlep baqtı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG