Rusiye tarafından işğal etilgen Aqmescitte sentâbr 16-da saat 16.00-dan 20.30-ğa qadar naqliye areketi qısmen sıñırlanacaq. Bu aqta Kremlge boysunğan Aqmescit memuriyetiniñ matbuat hızmeti bildire.
«Bütün Rusiye «Yedinaya Rossiya» siyasiy firqasınıñ Aqmescit şeer bölügi tarafından kütleviy teatral şekilde merasimniñ keçirilmesi munasebetinen sentabr 16-da saat 16.00-dan 20.30-ğa qadar Kirov caddesinde (Kirov caddesiniñ Gogol soqaşınen çatışmasından Kirov c. Sevastopolskaya soqağınen çatışmasına qadar) naqliye areketi toqtatılacaq», – dep aytıla beyanatta.
Bundan da ğayrı, sentâbr 16-da Sportivnaya meydanında, Serova ve Gorkogo soqağındaki paralı parkovka yerleri qapalı olacaq.
Sentâbr 18-de, rey berüv bir kününde Rusiye toprağında ve işğal etilgen Qırımda Rusiye Federatsiyası VII-nci çağıruv Federal toplaşuvı Devlet Dumasına saylavlar keçirilecek.
Qırımtatar Milliy Meclisi reisi Refat Çubarov işğal etilgen Qırım sakinlerini rusiyeli Devlet Dumasına qanunsız saylavlarnıñ keçirilmesi teşkil etilmesiniñ bütün basamaqlarını boykot etmege çağırdı.
Ukraina Yuqarı Radası ecnebiy devletler parlamentlerine ve halqara teşkilâtlarğa Rusiye Devlet Dumasına saylavlarnıñ Qırımda keçirilmesini nezaret etmekten vazgeçmege muracaat ete, bunen beraber, er angi şaraitte bunıñ neticeleriniñ tanımamağa çağıra. Ukraina parlamenti de bunıñ neticelerini tanımamağa çağıra.
Litvaniya Tışqı işler nazirligi sentâbr 14-te ilân etti ki, Rusiye Devlet Dumasına işğal etilgen Qırımda saylavlarnıñ neticelerini tanımaycaq ve bunıñ qanunsız olğanını saya.
