Link açıqlığı

Saatnıñ esas haberi

Bozulğan Mitridat merdivenini ziyaret etken soñ, Putin Keriçte daa bir müzey açacaq oldı


Rusiye prezidenti Vladimir Putin işğal etilgen Keriçni ziyaret etip, Mitridat merdivenine bardı. Merdiven boşluğı 2015 senesi bozulğan soñ, tamir işleriniñ alıp barılması alâ daa beklenile.

TASS agentliginiñ bildirgenine köre, Mitridat dağındaki arheologik qazmalarnı baqqan soñ, Putin Keriçte Mitridat merdiveni civarında tapılğan elnen yapılğan eski şeylerden eksponat yapmaq içün müzey teşkil etmege teklif etti. Rusiyeli baş nazir Dmitriy Medvedev teşebbüske qol tuttı ve para tapmağa söz berdi.

«(Müzey) Programma tizilmesi aqqında laf etmek kerek: bunı müzeyleştirmek kerek, ve bu yerde iç diniy daireler temsilcilerinen dava olmaz, çünki bu yerde eski yunan kilseler temsilcileri yoq», – dedi Putin.

Bildirilgen malümatqa köre, Keriç müzey hadimleri Putinge soñki yıllar içinde peyda olğan problemalarnı añlattı, bundan da ğayrı, tarihiy obyektniñ tamir etilmesi kerek olğanını ayttı.

Rusiye ükümetiniñ yolbaşçısı Qırım akimiyetine degerler ve arheologik tapılmalarnıñ saqlanmasını nezaret astında tutmağa avale etti.

«Qazmacılar bu yerge kele; ükümetni qullanmaq, ellerge urmaq ve kimseni mesüliyetke celp etmek kerek, çünki er şeyni hırsızlaycalar», – dep bildire agentlik Rusiye prezidentiniñ sözlerini.

Rusiye prezidenti Vladimir Putin sentâbr 15-te, cumaaqşamı künü Keriçke keldi, o, bu yerde Rusiye Devlet şurası prezidiumınıñ «devletniñ cenübinde naqliye sistemasınıñ inkişafı meseleleri boyunca» toplaşuv keçirecek. Bunen beraber, Putin Keriç köprü quruvı ketişatınen tanış olacaqtır.

Bundan evel rusiyeli prezident Qırım yarımadasını avgust 19-da ziyaret etti, o vaqıt «Tavrida» forumında iştirak etti.

Bundan evel Vladimir Putin işğal etilgen Qırımnı mart 18-de ziyaret etken edi. O vaqıt vertolötnen Keriç köprü quruvı yerini baqıp çıqtı ve Qırımnıñ içtimaiy-iqtisadiy inkişafı boyunca toplaşuvnı keçirdi.

Ukraina Tışqı işler nazirligi rusiyeli TİN-ne Vladimir Putinniñ işğal etilgen Qırımğa ziyareti munasebetinen narazılıq mektübini yollağan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG