Kremlge boysunğan Qırım ükümetiniñ yolbaşçısı Sergey Aksönov, teraktlar ve «malümat terrorizmi» ola bile, dep qorqa, onıñ fikrince, bu, sentâbr 18-de keçirilecek Devlet Dumasına saylavlarda saylav komissiyalarınıñ işini toqtata bile. Bu aqta o, antiterroristik komissiya ve operativ ştabınıñ nevbetten tış toplaşuvında ilân etti, dep bildire Rusiyege boysunğan Qırım ükümetiniñ matbuat hızmeti.
Sergey Aksönovnıñ sözlerine binaen, «saylav kampaniyası keçirilmesiniñ esas noqta-i nazarlarından biri, saylav bölükleri ve territorial saylav komissiyaları binalarınıñ antiterroristik qoruması, bu cümleden, uquq qoruyıcı organlarınıñ terrorizm eylemleri yapılması aqqında anonim qorquzmalarğa qarşı areket etmeleriniñ teşkil etilmesi ola».
Aksönov toplaşuvda bildirdi ki, «halqara terroristik faaliyetniñ faalleşkeninden ğayrı, saylavaldı vaqıtta «malümat terrorizmi» da ola bile, qaysı biri terrorizm eylemleri, patlatıcı aletler qoyulması ve diger sanki azırlanılğan cinayetler aqqında yañlış beyanatlarnen bağlı, ve bu saylav komissiyalarınıñ ve mütenasip acele hızmetlerniñ işini toqtata bile».
Rusiyede sentâbr 18-de Devlet dumasına, parlament aşağı palatasına saylavlar keçirilecek. Moskva ilk sefer bunı Ukraina toprağında – işğal etilgen Qırımda – keçirmege istey.
Qırımtatar Milliy Meclisi reisi Refat Çubarov işğal etilgen Qırım sakinlerini rusiyeli Devlet Dumasına qanunsız saylavlarnıñ keçirilmesi teşkil etilmesiniñ bütün basamaqlarını boykot etmege çağırdı.
Ukraina Yuqarı Radası ecnebiy devletler parlamentlerine ve halqara teşkilâtlarğa Rusiye Devlet Dumasına saylavlarnıñ Qırımda keçirilmesini nezaret etmekten vazgeçmege muracaat ete, bunen beraber, er angi şaraitte bunıñ neticeleriniñ tanımamağa çağıra. Ukraina parlamenti de bunıñ neticelerini tanımamağa çağıra.
