Qırımda sentâbr 15-te, cumaaqşamı künü «Çiygoznıñ işi» boyunca mahkeme toplaşuvı başlandı. Adliyeci Nikolay Polozovnıñ Twitterde bildirgenine köre, toplaşuv zararlanğan kişiniñ sorğuğa çekilmesinden başlandı.
Adliyeciniñ sözlerine köre, «Qırım samooboranası» azası olğan şaat Sergey Vahlin qırımtatarlağa yaramay baqqanını saqlamay.
«Ahtem Çiygoznıñ işi boyunca mahkeme başlandı. Birinci zararlanğan – Vahlin Sergey Yuryeviç – «Qırım samooboranası» azası. Zararlanğan Vahlin özüniñ şovinist olğanını ve qırımtatarlarğa yaramay baqqanını saqlamay. Bildirdi ki, onıñ NKVD-den babası «banderovetslerni urğan edi», – dep yazdı adliyeci.
Bundan evel cedvel qabul etildi, buña köre, toplaşuvlar aftada üç kere keçirilmeli.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ahtem Çiygoz mahkemede özüni qabaatlı tanımadı.
Sentâbr 7-de eki zararlanğan kişi – Bızin ve Şparev – mahkeme toplaşuvı keçirilgen vaqıtta bildirdiler ki, Ahtem Çiygoznı mitingde körmedi ve onıñ teşkil etüvde rolü aqqında bir şey bilmeyler.
Sentâbr 8-de «Çiygoznıñ işi» boyunca daa eki zararlanğan kişi de – Nesterov ve Petrovskiy – ayttılar ki, Ahtem Çiygoznı fevral 26-da mitingde körmedi ve onıñ merasimniñ teşkil etilüvinde ve keçirilmesinde rolü aqqında bir şey bilmey.
