Link açıqlığı

Qırımdaki Qurman sakini Nazim Memetovda, qomşusı oña qarşı şikâyet yazğanı içün, energiya bergen şirketler ve Rusiyege boysunğan uquq qoruyıcı organları tarafından bir sıra teşkerüvler keçirile. Bu aqta malümatnı Qırımtatar Qurultayı Merkeziy saylav komissiyasınıñ reisi Zair Smedlâyev Facebook saifesinde bildirdi.

Smedlâyev paylaşqan şikâyet nushasına binaen, qomşu Memetovnı elektrik energiyasını yañlış qullanğanınen qabaatlay. Bunen beraber, Memetovnıñ Meclis azası olğanını qayd ete.

Zair Smedlâyevniñ sözlerine binaen, Nazim Memetov iç bir vaqıt Meclis azası olmadı.

Smedlâyevniñ tahmin etkenine köre, işbu şikâyet «qırımtatarlarnı qorquzmaq içün töpeden emir ile» yazılğan.

Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler çoqlaştı, adamlar diniy sebeplerden taqip etile, dep qayd eteler Meclis temsilcileri ve uquq qoruyıcılar. Amma yarımadanıñ rusiyeli akimiyeti ve Kreml bunı red ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG