Yerli meclis reisi Enver Alâdinovnıñ evinde tintüv yekünlendi, Rusiyege boysunğan politsiya hadimleri narkotiklerni tapmadı, bundan soñ Alâdinovnıñ babasınıñ evine ketti. Bu aqta Qırım.Aqiqatqa bergen izaatında Qırımtatar Milliy Meclisi reisiniñ muavini Nariman Celâl bildirdi.
«O, (Enver Alâdinov – QA) maña telefon etti, ayttı ki, onıñ evinde bir şey tapmadılar, em de, taşlap qoymasa ediler, bir şey tapalmaz ediler. Ve ayttı ki, endi olar aynı köyde onıñ babasınıñ evine keteler», – dep añlattı Celâl.
Onıñ sözlerine binaen, uquq qoruyıcılar şimdiki vaqıtta hastahanede bulunğan onıñ babasınıñ boş evinde tintüv keçirecek edi. Bunıñ içün Alâdinov olarnen ketmege niyetlendi.
Bundan evel Nariman Celâl Facebok saifesinde bildirdi ki, Qırımnıñ Curçı rayonındaki Toqulçaq (Grişino) köyünde yerli meclis reisi Enver Alâdinovda Rusiyege boysunğan politsiya hadimleri tintüv keçirdi – narkotikler qıdırğan ediler.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler çoqlaştı, adamlar diniy sebeplerden taqip etile, dep qayd eteler Meclis temsilcileri ve uquq qoruyıcılar. Amma yarımadanıñ rusiyeli akimiyeti ve Kreml bunı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
