Rusiye ciddiy bir cenk zıddiyetine azırlanıp, aynı vaqıtta qomşularını arbiy küçünen qorquzacaq ola. Bunı bu künleri Rusiyeniñ cenüp regionları ve işğal altındaki Qırımda yekünlengen «Kavkaz-2016» arbiy talimleri isbatlay. Arbiy közeticelerniñ aytqanına köre, Kremlniñ istilâiy areketleri Ukrainanıñ devlet ve arbiy reberiyetini ukrain ordusınıñ ileri islâatlarını devam ettirmege mecbur ete.
Ekspertler Kremlniñ niyetlerine farqlı qıymet kese. Rusiye arbiy mütehassısınıñ aytqanına köre, «Kavkaz-2016» talimleri «yerli büyük cenkniñ azırlığı ola».
Ukraina havfsızlıq hızmeti (SBU) yolbaşçısınıñ sabıq muavini Aleksandr Skibinetskiyniñ fikirince, bunıñ kibi talimler Rusiye reberiyetiniñ tışqı siyaset oyunınıñ bir qısmı ola.
«Putin dünya alanında oynağan balaban bir santıraç oyunıdır. O, areket ete, soñra ise keri adım ata. Mence, Ukrainağa tolu istilâ azırlığı degil, muzakere yerlerini quvetlendirmek içün qorquzuv ve oyun areketleri oldı», – dep tüşüne o.
Taqım-ştab coğrafiyasınıñ hususiyetleri
«Kavkaz-2016» talimleri resmiy şekilde «taqım-ştab» olaraq adlandırılğan olsa da, anda bir çoq aviatsion, arbiy-deñiz ve yerustü bölükleri celp etildi. SSCB dağılğan soñ Rusiye ordusınıñ bu talimleri eñ büyüklerden oldı. Pavel Felgengauerniñ aytqanına köre, Rusiye baş ştabı talimlerde iştirak etkenler olaraq resmiy şekilde aydınlatılğan asker sayısı asılında on qat ziyade olğanını gizlemey.
Talimlerde 120 biñ asker iştirak etti. Büyük bir sayı. Ukraina ile cenkke başlamaq içün asker sayısı böyle olmalıPavel Felgengauer
«Talimlerde 120 biñ asker iştirak etti. Büyük bir sayı. Ukraina ile cenkke başlamaq içün asker sayısı böyle olmalı», – dep qayd ete Rusiye arbiy mütehassısı.
Onıñ qayd etkenine köre, ğarbiy region – Ukraina sıñırı yanındaki – bunıñ kibi büyük talimlerniñ keçirilmesi içün tesadufen saylanmadı.
Ukraina arbiy közeticisi Yuriy Butusov qayd ete ki, bu talimler aselet Ukraina sıñırı yanında ve işğal etilgen Qırımda keçirile.
«Duşmanımız er daqqada büyük istilâğa başlaması mümkün olğanını köstere. Bugünge qadar Donbass ve Qırımda şekillengen siyasiy vaziyetni küç ile deñiştirmege tırışmayıq dep yapıla», – dep ayttı Yuriy Butusov Radio Svobodağa.
Ukraina asimmetrik cevap qıdıra
Ekspertniñ aytqanına köre, talimlerge celp etilgen Rusiye askerleriniñ sayısı degil de, olarnıñ köstergen areketleriniñ keyfiyeti müimdir. Zaten, Rusiye stsenariyi boyunca talimler ukrain ordusı içün pek aktual degildir.
Muarebe qullanuv kontseptsiyamız bam-başqa, şu sebepten «küçük Rusiyege» oşamağa kerekmeyYuriy Butusov
«Resurs ve küçümiz farqlı. Onıñ içün Rusiye keçirgen talimlerni biz yapmaycaqmız. Muarebe qullanuv kontseptsiyamız bam-başqa, şu sebepten «küçük Rusiyege» oşamağa kerekmey», – dep tüşüne Yuriy Butusov.
Aynı vaqıtta, Kremlniñ istilâiy areketleri ve Rusiye ordusınıñ ciddiy azırlığı ukrain reberiyetini silânı zemaneviyleştirmek ve quvetlendirmeknen beraber, ukrain ordusı strukturasınıñ öptimizatsiyası aqqında tüşündire.
«Silâlı quvetlerimizniñ şimdiki qurulışı sovetlerniñ fena alını añdıra. İdareniñ ara alqalarınıñ sayısı arttı, lâkin ordu komplektatsiyasınıñ seviyesi – bayağı zayıf», – dep ayta Yuriy Butusov.
Bir yıl evelsi tasdıqlanğan yañı Ukraina Askeriy mezepi Rusiye tarafından silâlı istilâ telükesini aktual dep tanıy.
Radio Svoboda
Metinniñ asıl nushası ‒ Radio Svoboda saytında
