Haber siyaseti nazirligi Ukraina Sağlıq saqlav nazirligine Qırımda mahküm etilgen Qırımtatar Milliy Meclisi reisiniñ muavini İlmi Umerovnıñ sağlıq alı aqqında malümatnen muracaat etti. Ukraina Sağlıq saqlav nazirligi Umerovnı tedaviylenüvge qabul etmege razı oldı. Bu aqta Kiyevde keçirilgen matbuat konferentsiyasında Ukraina haber siyaseti naziriniñ birinci muavini Emine Ceppar ilân etti, dep bildire Qırım.Aqiqat mühbiri.
«Haber siyaseti nazirligi Sağlıq saqlav nazirligine, İlmi Umerovnıñ hastalıqlarını – şeker diabeti ve parkinson hastalığı –ve Aqmescit psihiatrik hastahanede bulunıp, Umerov er kün sağlığını coyğanını bildirip, muracaat etti. Sağlıq saqlav nazirligi İlmi Umerovnı Ukraina sağlıq saqlav nazirliginiñ Cumhuriyet klinika hastahanesine tedaviylenüvge qabul etmege razı oldı», – dedi Ceppar.
Onıñ qayd etkenine köre, Qırımda rusiyeli ükümet tarafından müsbet areketlerine ümüt yoq, amma Umerovnı azat etmek içün kerekli faaliyetniñ alıp barılması devam etecek.
Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.
Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.
Sentâbr 7-de İlmi Umerov klinikadan çıqtı.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
