Kremlge boysunğan Qırım mahkemesi Qırımtatar Milliy Meclisi reisiniñ muavini İlmi Umerovğa taqiqat malümatlarını faş etmege yasaq etti, yani oña bunı öz adliyecisinen muzakere etmek yasaqtır. Bu aqta Qırım adliyecisi Emil Kurbedinov Facebook saifesinde bildirdi.
«Bazı vaqıtları Qırım mahkemeleri ve mahkemecileri rusiyeli qanunnı tanımağa istemegenleri kibi kele. Olarnı böyle noqta-i nazar içün sögmelimi, maqtamalımı bilmeyim...», – dep bildirdi Kurbedinov, qaysı biri İlmi Umerov boyunca mahkeme toplaşuvlarında buluna edi.
Bunen beraber, Kurbedinov bildirdi ki, Umerovnıñ şikâyeti boyunca toplaşuvda Rusiye Federatsiyası Esas qanun mahkemesiniñ qararı «Qırım Yuqarı mahkemesinde ve Kiyev rayon mahkemesinde (Aqmescitte – QA) mahkemecilerge tesir etmedi».
«Esas qanun mahkemesiniñ bu qararı qabaatlanğanlardan taqiqat malümatını faş etmeme aqqında imzalavnı aluv yasağını tasdıqladı, bu ise imaye aqqını boza, yani taqiqatçı qabaatlanğanğa öz işi aqqında adliyecige aytmağa bile yasaq ete. Bu mantıqsızlıqtır. Amma bu mantıqsızlıqqa Qırımda mahkemeciler qol tuttı ve onı tasdıqladı!» – dep yazdı adliyeci.
Sentâbr 13-te işğal etilgen Qırımda, apellâtsion müessiseniñ İlmi Umerovnıñ imayesi boyunca üç mahkeme toplaşuvı keçirildi, Qırım mahkemecileri şikâyetniñ baqılmasını red etti.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
