Rosselhoznadzor ve rusiyeli uquq qoruyıcı müessiseleriniñ hadimleri teşkerüv neticesinde Aqyardaki «Merkuriy» supermarketinde «sanktsiyalı» aşayt mahsulatını tapıp, yoq etti. Bu aqta malümatnı Aqyar gümrüginiñ matbuat hızmeti bildire.
«Satışta Avropa birligi ve Ukrainada yapılğan, umumiy miqdar 40 kg teşkil etken qaşqaval, sarı yağ ve et mahsulatı bar edi. Qırım Cumhuriyeti ve Aqyar şeeri boyunca Rosselhoznadzor idaresiniñ hadimleri işbu mahsulatnı satıştan çıqardı ve yoq etti», – dep aytıla beyanatta.
Qayd etilgenine köre, memuriy uquq bozuvı aqqında bu işniñ baqılması Rusiyege boysunğan Aqyar naqliye prokuraturasınıñ nezareti astında buluna.
«Merkuriy» supermarketinde teşkerüvler devam ete. Bu ticaret müessisesi yolbaşçılarından izaatlar daa yoq.
bundan evel işğal etilgen Yaltada yerli işhane anbarında Ukraina qıtaiy qısmında ve Avropa devletlerinde yapılğan aman-aman üç tonna qaşqaval ve et mahsulatı yoq etildi.
Rusiyede ve Qırımda, evel Moskvağa qarşı, onıñ Qırımnı işğal etkeni ve Ukraina şarqında basqıncılığı sebebinden, sanktsiyalar kirsetken devletlerden aşayt mahsulatı ve köy hocalığı mahsulatınıñ italine sıñırlanma kirsetildi.
2015 senesi avgust 6-dan başlap, Rusiye prezidenti Vladimir Putinniñ emrine esaslanıp, qanunsız mahsulatnı, evel yapılğanı kibi teslim eticige qaytarmağa degil de, yoq etmege başladılar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
