İyd-el Adha ya da Qurban bayramı – musulmanlar içün ekinci büyük bayramdır. Acılıq bitkenini ifadelegen bayram Oraza bayramından 70 kün keçken soñ, Hicri taqvimge köre Zilhicce ayınıñ 10-uncı kününde İbrahim peyğamberniñ oğlunı qurban etmege azır olğanına bir hatıra olaraq qayd etile. Bu mubarek künde musulmanlar Yüce Allahqa ibadet ete, bir-birine ediyeler bağışlay, musafirlikke bara, qorantalarını bahşışlar ile quvandıralar. İslamda bu kün quvanç, şükür, ibadet, qardaşlıq, birdemlik ve ahlâq künüdir. Musulmanlar Yüce Allahqa daa yaqın olmaq içün bu künden faydalanmalı.
Peyğamberimiz (Sallallahu Aleyhi ve Sellem) şöyle buyurdı ki: «Er halqnıñ bir bayramı bardır, bu da – siziñ bayramıñızdır».
İslamda bu kün quvanç, şükür, ibadet, qardaşlıq, birdemlik ve ahlâq künüdir
Qırım musulmanları bu işte çette qalmay. 10 yıldan berli yarımadanıñ bir çoq regionında lâqayt qalmağanlar bala ve büyükler, qart ve yaşlar içün bayram tedbirlerini keçire. Bu tedbirlerde küçük balalar mingen eşek, deve, at kibi ayvanlarnı körmek mümkün. Adamlarnı davet etilgen sanatkâr ve çalğıcılar şeñlendire, olardan bazıları nam qazanğan soylarıdır. Bayramlar Küreş yarışlarısız da keçmey. Ya lezzetli ve güzel aşlarsız bayramlar olurmı?!
Aş ustaları malzemelerni qullanıp, cemaatqa eñ güzel şarq yemeklerini teklif ete: şiş kebap, pilâv, şorpa ve ilâhre. Bayram unutılmaz salüt ve atta ateş şoularınen yekünlene.
Bütün bular musulmanlarnıñ yüreklerinde islâm ruhı yaşasın, küçük balalar balalıqtan başlap bu müitte össin ve öz bayramlarını sevsin dep, yapıla. Faqat öyle bir alğa qaldıq ki, bazıları bu areketlerni cemaat nizamı ve qıymetlerini bozacaq cinayet olaraq tanıy.
2015 senesi yanvar ayı, 2016 senesi fevral ayı, 2016 senesi aprel ayı ve, niayet, aynı yılnıñ mayıs ayında bir sıra tintüv keçirildi, bu Bayramlarnı keçirmege başlağan musulmanlar ise apiske alınmağa başladı. Bu insanlar oturğan şeerlerinde musulman bayramlarnı anane şekline ketire edi. Olar musafirler bayramnıñ sıcaq ve unutılmaz müitini is etsin dep, er şeyni birer-birer tüşünip, teşkiliy meselelerge mesüliyetli yanaşa ediler.
Tünevin dindaşları içün bayram yapqanlar bugün cemaat içün «telükeli» oldı
Sağlam tüşüngen er bir insan añlay ki, bütün bu apis cezaları, yaqalav, basqılar masqara ve iç bir mantıqqa ve aqılğa uymağan bir şey. Olarnı tanığan er bir insan, milleti ve dinine baqmadan, dinini kütken printsipial insanlar, yardımğa azır ve sözüne sadıq olğanlarını aytar. Amma, buña baqmadan, eñ büyük bayramlarnıñ temelinde olğanlar – apiske tüşti. Olarnı terrorizm ya da cemaat nizamını bozmaq ıntıluvı kibi «ciddiy» bir cinayet qabaatlaylar.
Balalarnıñ tebessümi – bugün cinayet sayılamı? Büyüklerniñ yüzlerinde baht ve ğurur közyaşları – terrorizm sayılamı?! Halqnıñ qıymetleri ve medeniyetini saqlap qalma – cemaat nizamı içün bir telükemi?!
Tasavvur etiñiz: tünevin dindaşları, tuvğanları ve yaqınları, balaları içün bayram yapqanlar, musafirler memnün olsun dep, özüni bergenler bugün cemaat içün «telükeli» oldı.
Bu mubarek bayram kününde Allahtan adaletsiz bir şekilde mahküm etilgenlerge lâqayt qalmağanlarnıñ dualarını qabul etmesini isteyim... Allah Yardımını istegenlerniñ dualarını qabul eylesin!
Allah Quran-ı Kerimde buyura ki: «Maña dua etiñiz, duañızğa cevap bereyim» («al-Ğafir» suresi, 60 ayet).
Gülsum Aliyeva, «Qırım birdemligi» cemaat birleşmesiniñ faali
«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün