Rusiye Tışqı işler nazirliginiñ Malümat ve matbuat bölügi «Kiyevniñ 2016 senesi sentâbr 18-de Devlet Dumasına saylavlar keçirilecek künü Ukrainada rusiyeli tışqı müessiselerde havfsızlıqnı teminlemekni red etkeni munasebetinen» izaat berdi.
«Rusiyege ultimatumlar qoymaq Kiyev ükümetiniñ ıntıluvları külünçlidir. Qırım Rusiyeniñ ayırılmaz bir qısmıdır... Ukraina territoriyasında yerleşken rusiyeli tışqı müessiselerde Rusiye Federatsiyası Devlet Dumasına saylavlar boyunca rey berüv keçirilmesiniñ mümkün olmağanı aqqında sentâbr 10-da Kiyev ükümeti tarafından qabul etilgen qarar, ahlâq ve halqara munasebetler qaideleriniñ bozuvı ola.
Kiyev qabul etken qararnıñ maqsadı, Ukraina toprağında daima yaşağan ya da vaqtınca bulunğan rusiyeli vatandaşlarnı olarnıñ serbest arzu aqqından marum etmektir. Kiyev Rusiye ve Ukraina arasındaki munasebetlerni keleckete kerginleştirmek içün kene de mahsus böyle adım yapa», – dep aytıla Rusiye Tışqı işler nazirliginiñ izaatında.
Sentâbr 18-de, rey berüv bir kününde Rusiye toprağında ve işğal etilgen Qırımda Rusiye Federatsiyası VII-nci çağıruv Federal toplaşuvı Devlet Dumasına saylavlar keçirilecek.
Qırımtatar Milliy Meclisi reisi Refat Çubarov işğal etilgen Qırım sakinlerini rusiyeli Devlet Dumasına qanunsız saylavlarnıñ keçirilmesi teşkil etilmesiniñ bütün basamaqlarını boykot etmege çağırdı.
Ukraina Yuqarı Radası ecnebiy devletler parlamentlerine ve halqara teşkilâtlarğa Rusiye Devlet Dumasına saylavlarnıñ Qırımda keçirilmesini nezaret etmekten vazgeçmege muracaat ete, bunen beraber, er angi şaraitte bunıñ neticeleriniñ tanımamağa çağıra. Ukraina parlamenti de bunıñ neticelerini tanımamağa çağıra.
