OSCE Demokratik müessiseler ve insan aqları boyunca Büro missiyası Rusiye Devlet Dumasına saylavlarğa işğal etilgen Qırımğa öz nezaretçilerini yollamaycaq. Bu aqta missiya yolbaşçısı Yan Petersen rusiyeli «İzvestiya» neşrine bergen intervyusında bildirdi.
«Devlet boyunca belgilengen çoq müddetli nezaretçiler bütün territoriyañıznı nezaret etmeli. Amma OSCE bütün OSCE aza devletleriniñ añlaşması boyunca çalışqanı sebebinden, Qırım nezaretimiz astına tüşmey», – dedi Yan Petersen.
Bunen beraber, o, işğal etilgen Qırımda saylavlar neticelerini tanıması imkânı aqqında sualge cevap berip, «maruzamızda yarımada aqqında iç malümat olmaz», dep qayd etti.
Sentâbr 18-de, rey berüv bir kününde Rusiye toprağında ve işğal etilgen Qırımda Rusiye Federatsiyası VII-nci çağıruv Federal toplaşuvı Devlet Dumasına saylavlar keçirilecek.
Qırımtatar Milliy Meclisi reisi Refat Çubarov işğal etilgen Qırım sakinlerini rusiyeli Devlet Dumasına qanunsız saylavlarnıñ keçirilmesi teşkil etilmesiniñ bütün basamaqlarını boykot etmege çağırdı.
Ukraina Yuqarı Radası ecnebiy devletler parlamentlerine ve halqara teşkilâtlarğa Rusiye Devlet Dumasına saylavlarnıñ Qırımda keçirilmesini nezaret etmekten vazgeçmege muracaat ete, bunen beraber, er angi şaraitte bunıñ neticeleriniñ tanımamağa çağıra. Ukraina parlamenti de bunıñ neticelerini tanımamağa çağıra.
Rusiye prezidenti Vladimir Putinniñ matbuat kâtibi Dmitriy Peskov sentâbr 8-de ilân etti ki, Rusiye ecnebiy devletler parlamentleriniñ Qırım territoriyasında keçirilecek saylavlarnı neticelerini tanımağa red ete bilecegine diqqat bermeycek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
