Sentâbr 12-15 künleri dünya musulmanları Qurban bayramını qayd ete. Qırım camilerinde sentâbr 12-de bayram hutbeleri keçirildi ve bayram namazı qılındı. Yarımadada bayram üç kün devam etecek.
Bayram arefesinde qırımtatarlar çiberek, belâş ve diger hamır aşlar qavurdı, dep bildire Avdet. Bu adet «qoqu çıqarmaq» dep adlandırıla. Adet boyunca, qavurılğan aşlarnen yaqınlar, soy-soplar ve qomşular sıylana.
Qırım musulmanları içtimaiy ağlarda bir-birlerini bayramnen hayırlamağa endi başladı.
Qurban bayramı, musulmanlarnıñ eñ büyük bayramlarından biri ola, bu künlerni Mekkege acılıqnen bağlaylar. Qurban Oraza bayramından 70 kün keçken soñ, Zul-Hicca ayınıñ 10-cı künü İbrahim (a.s.) qurbanı hatırasına bağışlanıp qayd etile.
