Rusiye tarafından işğal etilgen Qırımğa Qıtaydan ilk resmiy teşkil etilgen turistler taqımı keldi. Bu aqta «RİA Novosti» agentligine Kremlge boysunğan Qırm parlamentiniñ sanitar-kurort kompleksi ve turizm boyunca komitetiniñ yolbaşçısı Aleksey Çernâk bildirdi.
«Sentabr 9-da aqşam Aqmescit şeeri ava limanına Qıtaydan turistlerniñ ilk resmiy taqımı keldi, onıñ esas maqsadı, rusiyeli Qırımnı ziyaret etmek ve yarımadanen tanış olmaqtır», – dep ayttı Çernâk.
Onıñ sözlerine binaen, bu, Rusiye ve Qıtay arasındaki vizasız sıñırdan keçüv aqqında añlaşma boyunca işğal etilgen Qırımğa ilk yapılğan ziyarettir.
«Bugün bu birinci taqım, ve kelecekte ciddiy bir perspektivadır. Qıtay – Qırımnı er angi miqdarda turistlernen teminley bilecek yekâne bir devlettir, qıtaylı turistniñ merağı ise, turistik mevsimni eki-üç aydan aman-aman bütün yılğa keñleştire bile», – dedi Çernâk.
Bildirilgenine köre, Qıtay turistleri Livadiya, Vorontsov ve Hanlar saraylarını, «Massandra», Hersones, «Taygan» safari bağçasını ve Sudaq ceneviz qalesini ziyaret etecek, bundan soñ Soçi şeerine ketecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
