Çehiya prezidenti Miloş Zeman Rusiye tarafından işğal etilgen Qırımnıñ Ukrainağa qaytarılması mümkün olmağanını saya. Bu aqta The New York Times neşri bildire.
«İşğal, halqara añlaşmalarnıñ bozuluvı demektir, ve, şübesiz ki, Ukraina topraq bütünligini kefil etken añlaşmalar bozuldı», – dedi Zeman oquyıcınıñ sualine cevap berip.
«Başqa taraftan, siznen razım, Hruşöv bağışlanmaz bir aqılsızlıq yaptı ve bugün dünya siyasetçileri Qırımnıñ Ukrainağa qaytarılması mümkün olmağanını tanıy», – dep ayttı Zeman.
Bunen beraber, nasıl siyasetçiler aqqında aytqanını qayd etmedi.
Zeman Avropa birligi sanktsiyalarına qarşı çıqa ve sıq-sıq Rusiye tarafını tutqan noqta-i nazarlarını bildire. Bundan da ğayrı, o, Ekinci cian cenki yekünlenmesine bağışlanğan, 2015 senesi mayıs ayında Moskvada keçirilgen merasimlerde iştirak etken yekâne ğarbiy lider oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
