Link açıqlığı

İşğal etilgen Qırımda İndistandan turistlerni celp etmege isteyler, böyle maqsat ile «Açıq Qırım» forumı çerçivesinde İndistan turistik biznesi ve kütleviy haber vastaları temsilcileri içün Qırım boyunca reklama-tanıştıruv turnıñ keçirilmesi planlaştırıldı. Bu aqta Kremlge boysunğan Qırım Kurort ve turizm nazirliginiñ saytında bildirile.

«Beş kün devam etecek ziyaret çerçivesinde Deli, Mumbai, Ahmadabad, Uttar-Pradeş, Çennay, Varanasi, Lakhnau, Bangalor ve Goadan turistik saasındaki mütehassıslar ve kütleviy haber vastaları Köktebel, Sudaq, Novıy Svet, Aluşta, Yalta, Aqyar, Qarasuvbazar ve Bağçasaray rayonlarındaki ekskursiya ve yerleşüv obyektlerini ziyaret etecek. Bundan da ğayrı, olar «Açıq Qırım» forumınıñ iş programmasında iştirak etecek», – dep bildire resurs.

Ameldeki Qırım kurort ve turizm naziri Sergey Strelbitskiyniñ fikrince, musafirlerge «yarımada raatlıq içün havfsız ve oñaytlı» olğanını köstermek kerek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG