Rusiye mudafaa naziri Sergey Şoygu sentâbr 9-ğa Rusiyeniñ «Qavqaz-2016» strategik taqım-ştat ögrenüvleriniñ esas basamaqlarından biriniñ keçirilmesi planlaştırılğan işğal etilgen Qırımğa keldi, dep bildire Rusiye Mudafaa nazirliginiñ matbuat hızmeti.
Elde etilgen malümatqa binaen, Şoygu ögrenüvler levhalarınıñ ömürge keçirilmesi vaqtında ştablar ve ordularnıñ areketlerini şahsen teftişleycek.
Opuk poligonında Rusiye ordusı taqımınıñ şartlı duşmannıñ ücümini qaytaruv boyunca areketler işlep baqılacaq, ögrenüvlerge celp etilgen bütün ordu çeşitleri qullanılacaq.
Sentâbr 5-te, bazarertesi künü Rusiye cenübinde ve işğal etilgen Qırımda «Qavqaz-2016» taqım-ştab strategik ögrenüvleri başlandı. Ukrain istihbaratınıñ malümatına binaen, Rusiye Cenübiy-Ğarp yönelişinde tahminen 100 biñ asker, 10 biñden ziyade arbiy ve diger tehnika, 60 gemi ve 400 uçaq ve vertolötnı bir arağa ketirdi.
Ekspertlerniñ fikrince, «Qavqaz-2016» ögrenüvlerinde Rusiye Federatsiyasınıñ silâlı quvetleri Ukrainağa qarşı ameliyatnı işlep baqacaq.
Avgust 18-de Ukraina prezidenti Petro Poroşenko ilân etti ki, Rusiye kütleviy şekilde Ukrainağa kire bile ve böyle alda arbiy vaziyet kirsetile bilecegini ayttı.
