Aqmescitte rekonstruktsiyadan soñ Seit-Settar camisiniñ açılış merasimi keçirilecek. Bu aqta Qırım ve Sevastopol musulmanları diniy idaresiniñ matbuat hızmeti bildire.
Bildirilgenine köre, merasim sentâbr 11-de Klara Tsetkin soqağında keçirilecek. Camini Qırım müftisi Emiralı Ablayev ve Moskva patriarhatı ortodoks kilsesiniñ Aqmescit ve Qırım mitropoliti Lazar açacaq.
2014 senesi cami qurucılıq işleri içün qapatıldı. Bu yerde medrese, memuriy binalar qurmaq ve territoriyanı yeşilletmek niyetlenile edi, dep qayd ettiler müessisede.
Aqmescitteki Seit-Settar camisi XIX asırnıñ ortasında quruldı. 1930 seneleriniñ soñunda cami qapatıldı, binası hocalıq ihtiyaclarına qullanılğan edi. 1990 seneleriniñ başındamescit musulmanlarğa qaytarıldı ve tamir etildi. 2010 senesi camini yaqmağa tırıştılar.
