Ukrain Helsinka insan aqları boyunca birlikniñ (UGSPL) uquqçıları, Kremlge boysunğan Qırım Yuqarı mahkemesi tarafından qabul etilgen Qırımtatar Milliy Meclisi faaliyetiniñ yasaqlanması aqqında qararğa qarşı Meclis adliyecileriniñ şikâyet arizasınıñ baqılmasını refaqat etecek. Rusiye Yuqarı mahkemesinde şikâyet baqılmasınıñ keçirilmesi sentâbr 29-ğa belgilendi. Bu aqta UGSPL matbuat hızmeti bildire.
Bunen beraber, Ukrain Helsinka birligi ukrain kütleviy haber vastalarını mahkeme toplaşuvı ceryanı aqqında malümat aydınlatmağa davet ete, ve akkreditatsiya boyunca yardım etecegi aqqında söz bere.
Aprel 26-da Rusiye kontrol etken Qırım Yuqarı mahkemesi yarımadada Meclis faaliyetini yasaq etti. Dünya toplulığı Rusiye akimiyetiniñ böyle areketlerine qattı narazılıq bildirdi. Meclis imayesi Rusiye Yuqarı mahkemesine apellâtsion şikâyetini berdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
