Link açıqlığı

Qırımtatar Milliy Meclisi reisiniñ muavini İlmi Umerov ilân ete ki, Rusiye tarafından işğal etilgen Qırımnı, bu yerde cinaiy taqip etilgenine baqmadan, terk etmek niyeti yoqtır.

«Yoq. Men istese edim, çoqtan bunı yapar edim», – dedi Umerov Radio Svobodağa bergen intervyusında.

Qırım uquq qoruyıcı organları keçmege mecbur etken psihiatrik ekspertizanı «tesir usulı» dep adlandırdı.

Umerovnıñ tahmin etkenine köre, onıñ işi boyunca taqiqat devam etecek.

«Taqiqatçı cıyılğan malümatnı prokuraturağa teslim etecek, bundan soñ bular mahkemege yollanılacaq, anda qarar alınacaq», – dep ilân etti Umerov.

Sentâbr 7-de Ayşe Ümerova – İlmi Ümerovnıñ qızı – mahkeme-tibbiy ekspertiza neticelerine köre, babası «ruhiy ceetten sağlam» olğanını ayttı.

İlmi Ümerov bu sene mayıs ayında Bağçasarayda yaqalandı, şimdiki vaqıtta o çıqma yasağı altında buluna. Onı Rusiyeniñ topraq bütünligini bozmaq çağıruv yapqanınen qabaatlaylar.

2015 senesi ATR qırımtatar telekanalında «Rusiyeni Qırım ve Donbasstan çekilmege mecbur etmek kerek» lafları Rusiye Federatsiyasınıñ topraq bütünligini bozmaq çağıruvları olaraq tanıldı. İlmi Ümerovnıñ fikirince, onıñ sözleri aytqanlarından çıqarılğan edi. «Men devletniñ topraq bütünligini bozmağa çağırmadım. Men Rusiye Qırımnı Ukrainağa qaytarsın dep, oña qarşı cezalarnı quvetlendirmege çağırdım. Men Ukraina ve Rusiyeniñ topraq bütünligi ğayrıdan tiklensin isteyim», – dep ayttı İlmi Ümerov mahkemelerden birinde.

Onı mahsus psihiatrik hastahanesine zorlap yerleştirgen soñ onıñnen birdemlik aktsiyaları Avroapnıñ bir çoq memleketi ve şeerinde olıp keçti. Human Rights Watch, Avropa Birligi, Ukraina Tışqı işler nazirligi, Ukraina Yuqarı Radasınıñ çetel işleri komiteti, Ukraina prezidenti Petro Poroşenko oña qoltutqanını bildirdiler.

XS
SM
MD
LG